Hammelessen 2025

Zürich, Münzplatz & Widder-Saal, 6. Juni 2026

‘S’isch wichtig – und drum nöd vergässe:
im Juni isch dänn s’Hammelässe,
det, bim Widder, bald isch’s Ziit!
De Apéro vom Lorenz Schmid;
de Schpäck vom Bomio Nicola
(er schpändet au de Hamme, da);
de Hammel chunnt – es isch es Gnuss
vom ZM Blattner Lucius!
Mir danked herzlich dene Schpänder
i ihrne schöne Widder-Gwänder!

De ZM grüesst – er isch de Bescht -
mit kecke Wort die Ehregescht:

De Chrigel Städeli vom Wegge
sitzt da bi eus (und nöd im Egge …)
Als ZM isch er lang im Ränne –
er chönnt de Ruedi Brun no känne!
Debii isch no de Michi Baur
und dä isch würkli gar nöd sauer,
dänn er isch schliessli – ohni Fruscht –
bim Wegge Meischter vo de Luscht!

De jüngschti ZM – ganz en muntere –
de Thomi Landolt vo de Fluentere;
ETHler vo de Proveniänz –
drum mega gschiid! (chun’sch nöd id’Chränz …)
Begleited wird er – lueg au da –
vom Chronischt, em Oprecht Nicola.

Dänn isch da no – s’isch würkli net –
de Präsident vom ZZZ:
de Felix Boller – Fraueschwarm!
(bi ihm wird’s Zürcher Fraue warm …).
De Cédric Niggli isch au da
er isch en Traumolog, de Maa;
im ZZZ sitzt er debii –
mer hofft er schlaaft debii nöd ii!

De Stücki Jürg begrüesst no d’Gselle
und tuet au alli Gescht ufzelle.
De Lucius ehrt d’Jubilare
wo immer fitter wärded, mit de Jahre!
(lueg d’Liischte am Schluss)

Gässe hämmer würkli toll;
die Täller, die sind schmatzig-voll
mit Hamme, Sänf und feinem Gmües;
d’Härdöpfel im Salat sind süess;
Entrecôte vom Lamm – en Gnuss;
Risotto git’s mit Thymianjus!
Dezue git’s Wasser, Wy und Bier
«und genau Solches lob ich mir!»

Die Rede, die sind alli guet:
de Lucius redt’mit Härz und Gluet;
de Städeli mit tüüfem Sinn:
«s’isch schön, dass ich hüt bin-eu bin!»
De Landolt Thomi – eloquänt –
well er ja au nüt anders kännt!

«En schöne Widder-Aalass isch es gsii!
Schön sind so vill vo Eu debii!»,
verdankt de Lucius am Schluss,
«Ja, s’Hammelässe isch en Gnuss!»

Hammelessen 2025

Marco Baur, Protokollführer